கால்நடை வைத்தியர்கள் மாத்திரமல்ல :அனைத்துத் துறைகளினரும் சவால்களை மிஞ்சி சேவையாற்றுகின்றனர்- வடக்கு மாகாண ஆளுநர் தெரிவிப்பு கால்நடை வைத்தியர்கள் மாத்திரமல்ல அனைத்துத்துறையினரும் பெரும் இடர்பாடுகளுக்கு மத்தியில்தான் தங்கள் சேவைகளை முன்னெடுக்கின்றார்கள் என வடக்கு மாகாண  ஆளுநர் நா.வேதநாயகன்  தெரிவித்ததுடன், இடர்களுக்கு மத்தியிலும் மக்களுக்கு தேவையான உங்கள் சேவைகள் தொடரவேண்டும் எனவும் கோரிக்கை விடுத்தார்.வடக்கு மாகாண அரச கால்நடை வைத்திய அதிகாரிகள் சங்கத்தின் வருடாந்த மாநாடு வலம்புரி ஹோட்டலில் இன்று புதன்கிழமை (02.07.2025) இடம்பெற்றது. இந்த நிகழ்வில் பிரதம விருந்தினராகக் கலந்துகொண்டு உரையாற்றுகையிலேயே மேற்கண்டவாறு ஆளுநர் குறிப்பிட்டார். அவர் மேலும் தெரிவித்ததாவது, வட மாகாணம் கால்நடை உற்பத்தித் துறைக்கு சிறப்பான ஆற்றலைக் கொண்டுள்ளது, எங்களது விவசாயிகள் தங்கள் வாழ்க்கைக்கு அதைச் சார்ந்துள்ளனர். உங்கள் பணி உண்மையிலேயே விலைமதிப்பற்றது. சவால்கள் மற்றும் குறைபாடுகளை எதிர்கொண்டு, நீங்கள் வடக்கு மாகாணத்துக்கு விதிவிலக்கான சேவையை தொடர்ந்து வழங்குகிறீர்கள். கால்நடைகளின் நலனுக்கான உங்கள் அர்ப்பணிப்பு பாராட்டத்தக்கது.நீங்கள் கால்நடைகள் மீது பச்சாதாபமும் கருணையும் கொண்டவராக இருக்க வேண்டும். 'ஜீவ காருண்யம்' என்பது அனைத்து மதங்களிலும் ஒரு அடிப்படைக் கொள்கையாகும். பெரும்பாலும் அந்தச்சேவை சரியான நேரத்தில் கிடைப்பதை ஒரு தடையாக நாம் எதிர்கொள்கிறோம். எதிர்காலத்தில் இந்த சவால்களை நாம் சமாளித்து, வடக்கு விவசாயிகள் மற்றும் குடும்பங்களுக்கு செலவு குறைந்த, விரைவான, மலிவு விலையில் சேவையை வழங்க முடியும் என்று நம்புகிறோம்.அத்துடன், கட்டாக்காலி நாய்கள் கட்டுப்பாடு மற்றும் ரேபிஸ் தடுப்பூசி கட்டுப்பாடு போன்ற முக்கியமான சிறப்புத் திட்டங்களுக்கான உங்கள் ஆதரவு, பொதுச் சுகாதாரம் மற்றும் பாதுகாப்புக்கான உங்கள் உறுதிப்பாட்டை எடுத்துக்காட்டுகிறது, என்றார்.