கல்விச் சீர்திருத்தக் குளறுபடிகளுக்குப் பொறுப்பேற்று பிரதமர் பதவி விலக வேண்டும்: வருண தீப்த ராஜபக்ச வலியுறுத்து கல்வித் துறையில் தற்போது எழுந்துள்ளModule (கற்றல் தொகுதிகள்) தொடர்பான பிரச்சினைக்கு அப்பால், கல்விச் செயல்பாட்டில் மிகவும் சிக்கலான ஒரு நிலைமை காணப்படுவதாக எதுல் கோட்டையில் உள்ள ஐக்கிய மக்கள் சக்தியின் தலைமையகத்தில் இன்று (09) இடம்பெற்ற ஊடகவியலாளர் சந்திப்பில் கலந்துகொண்ட கம்பஹா தொகுதி அமைப்பாளர் வருண தீப்த ராஜபக்ச தெரிவித்தார். கல்வி சீர்திருத்தம் நாட்டுக்குத் தேவையானது என்பதில் மாற்றுக் கருத்து இல்லை என்றாலும், கொண்டு வரப்படும் ஒவ்வொரு சீர்திருத்தமும் சரியானது என்று கூற முடியாது என அவர் சுட்டிக்காட்டினார். தற்போதைய அரசாங்கம் முன்வைத்துள்ள கல்வி சீர்திருத்தமானது புதிய ஒன்றல்ல என்றும், 40 ஆண்டுகளுக்கு முந்தைய பழைய சீர்திருத்தங்களில் சில மாற்றங்களைச் செய்து கல்வி அமைச்சர் அதனை முன்வைத்துள்ளதாகவும் அவர் குற்றம் சுமத்தினார்.எதிர்கால சந்ததியினரை இலக்காகக் கொண்டு கல்வி சீர்திருத்தங்கள் அமைய வேண்டும் என்றாலும், தற்போதைய தேசிய மக்கள் சக்தி அரசாங்கத்தின் சீர்திருத்தங்களில் அத்தகைய தொலைநோக்குப் பார்வை இல்லை என அவர் குறிப்பிட்டார். அத்துடன், முறையான வசதிகளை ஏற்படுத்தாமல் அவசர அவசரமாக இந்த மாற்றங்களைச் செய்வதன் மூலம் கல்வித் துறையில் பெரும் குழப்பம் ஏற்பட்டுள்ளதாகவும், இதற்கு கல்வி அமைச்சர் ஹரினி அமரசூரிய பொறுப்பேற்க வேண்டும் என்றும் அவர் தெரிவித்தார். ஆசிய அபிவிருத்தி வங்கியின் நிதியைப் பெறுவதற்காக அல்லது வேறு நோக்கங்களுக்காக இத்தகைய சீர்திருத்தங்களைச் செய்யப் போய் அரசாங்கம் இன்று பெரும் சிக்கலில் மாட்டிக்கொண்டுள்ளதாக அவர் கூறினார். புதிய கல்வித் திட்டத்தில் QR குறியீடுகள் மற்றும் இணையதளங்களைப் பயன்படுத்த வேண்டியுள்ளதாகக் குறிப்பிட்ட அவர், அனைத்து மாணவர்களுக்கும் இதற்கான உட்கட்டமைப்பு வசதிகள் உள்ளனவா எனக் கேள்வி எழுப்பினார். கடந்த நல்லாட்சி அரசாங்கத்தின் போது மாணவர்களுக்கு 'டேப்' (Tab) கணினிகளை வழங்க முன்மொழியப்பட்ட போதிலும், தற்போதைய அரசாங்கத்தின் திட்டங்கள் மூலம் மாணவர்களுக்குச் சமமான வாய்ப்புகள் கிடைக்கவில்லை என அவர் சாடினார். சஜித் பிரேமதாச தலைமையிலான ஐக்கிய மக்கள் சக்தி பாடசாலைகளுக்கு 'ஸ்மார்ட்' வகுப்பறைகளை வழங்கிய போது அதனை அரசாங்கம் கேலி செய்ததாகவும், ஆனால் இன்று அடிப்படை வசதிகள் இன்றி முன்னெடுக்கப்படும் சீர்திருத்தங்களால் நெருக்கடி ஏற்பட்டுள்ளதாகவும் அவர் தெரிவித்தார்.குறிப்பாக, 6 ஆம் தர கற்றல் தொகுதியில் (Module) சிறுவர்களுக்குப் பொருத்தமற்ற இணையதள முகவரி சேர்க்கப்பட்டிருப்பது பாரிய தவறு என்றும், இது அச்சுப் பிழை அல்ல என்றும் அவர் குறிப்பிட்டார். ஓரினச்சேர்க்கையாளர்கள் தொடர்பிலான இணையதளங்கள் இதில் உள்ளடக்கப்பட்டுள்ளமை குறித்துப் பேசிய அவர், தனிப்பட்ட ரீதியில் பிரதமர் ஹரினி அமரசூரியவுக்கு எதிராக முன்னெடுக்கப்படும் தனிநபர் அவதூறுகளைத் தான் எதிர்ப்பதாகவும், ஆனால் ஒரு தலைவியாக இந்தத் தவறுக்கு அவர் பொறுப்பேற்க வேண்டும் என்றும் கூறினார். பின்லாந்து போன்ற நாடுகளில் ஆசிரியர்களின் முழுமையான மேற்பார்வையின்றி மாணவர்கள் இணையத்தைப் பயன்படுத்த அனுமதிப்பதில்லை எனச் சுட்டிக்காட்டிய அவர், இலங்கையில் இவ்வாறான பொறுப்பற்ற முறைகள் கையாளப்படுவதாகக் குற்றம் சுமத்தினார்.இந்த விவகாரத்தில் மகாநாயக்க தேரர்களைச் சந்தித்து விளக்கமளித்த கல்வி அமைச்சர், அந்த இணையதளங்களைப் பார்க்குமாறு மாணவர்களுக்குப் பணிக்கவில்லை என்று கூறுவது வேடிக்கையானது என அவர் தெரிவித்தார். மேலும், பிரதமருக்கு எதிரான நம்பிக்கையில்லாப் பிரேரணையில் அரசாங்கத்திற்குப் பெரும்பான்மை பலம் இருந்தாலும், ஆளும் கட்சி எம்பிக்கள் இந்தத் தவறான கல்விச் சீர்திருத்தங்களுக்கு ஆதரவளிக்கிறார்களா என்பதை இதன் மூலம் தெரிந்துகொள்ளலாம் என அவர் கூறினார். இந்த விவகாரம் தொடர்பில் குற்றப்புலனாய்வுத் திணைக்களத்தில் முறைப்பாடு செய்யப்பட்டுள்ள போதிலும், அமைச்சின் கீழ் உள்ள ஒரு தொகுதியை முறையாகச் சரிபார்க்காதது அமைச்சரின் பொறுப்பற்ற தன்மையைக் காட்டுவதாகவும், இதற்காக பிரதமர் பதவி விலக வேண்டும் என்றும் அவர் வலியுறுத்தினார்.கடந்த ஒரு வருட காலப்பகுதியில் தரமற்ற மருந்துப் பொருட்கள், தரமற்ற நிலக்கரி என அனைத்தையும் தரமற்ற முறையிலேயே இந்த அரசாங்கம் முன்னெடுத்துள்ளதாகவும், தற்போது கல்வித் துறையிலும் அதுவே நடந்துள்ளதாகவும் அவர் தெரிவித்தார். அத்துடன், 'டிட்வா' சூறாவளி போன்ற இயற்கை அனர்த்தங்களின் போது அரசாங்கம் போதிய முன்னெச்சரிக்கை நடவடிக்கைகளை எடுக்கத் தவறியுள்ளதாகவும், தோல்விகளில் இருந்து பாடம் கற்றுக்கொள்ள அரசாங்கம் இன்னும் பக்குவப்படவில்லை என்றும் வருண தீப்த ராஜபக்ச தனது உரையில் மேலும் சுட்டிக்காட்டினார்.