ரயில்களில் அலைமோதும் மக்கள்: கட்டணங்களை உயர்த்த வேண்டாமென கோரிக்கை இலங்கையில் அண்மைய எரிபொருள் விலை உயர்வு மற்றும் தனியார் பேருந்து கட்டண அதிகரிப்பு காரணமாக, பொதுமக்கள் பெரும் எண்ணிக்கையில் ரயில் சேவையை நாடத் தொடங்கியுள்ளதாக ரயில் நிலைய அதிபர்கள் சங்கம் தெரிவித்துள்ளது.நேற்று நடைபெற்ற ஊடகவியலாளர் சந்திப்பில் கருத்து வெளியிட்ட அந்தச் சங்கத்தின் பொதுச் செயலாளர் கசுன் சாமர ஜயசேகர, தற்போதைய நிலைவரங்கள் குறித்து முக்கிய தகவல்களைப் பகிர்ந்து கொண்டார்.எரிபொருள் விலை உயர்வால் மக்கள் தமது தனிப்பட்ட வாகனங்கள் மற்றும் பேருந்து பயணங்களைக் குறைத்துக்கொண்டு, மலிவான போக்குவரத்து சேவையான ரயிலைத் தெரிவு செய்துள்ளனர். இதனால் கடந்த சில நாட்களாக ரயில்வே திணைக்களம் கணிசமான இலாபத்தை ஈட்டி வருவதாக அவர் குறிப்பிட்டார்.கொழும்பு கோட்டை உள்ளிட்ட பிரதான ரயில் நிலையங்களில் பயணிகளின் எண்ணிக்கை முன்னெப்போதும் இல்லாதவாறு அதிகரித்துள்ளது.எனினும், பயணிகளின் தேவை அதிகரித்துள்ள போதிலும் ரயில் பயண வாரங்களின் (Train Turns) எண்ணிக்கை குறைக்கப்பட்டுள்ளதால் பொதுமக்கள் கடும் சிரமங்களை எதிர்கொள்வதாக கசுன் சாமர சுட்டிக்காட்டினார்."பொதுமக்களுக்கு எஞ்சியுள்ள ஒரேயொரு மலிவான போக்குவரத்து சேவை ரயில் மாத்திரமே. எனவே, நிலவும் பொருளாதார கஷ்டங்களைக் கருத்திற்கொண்டு ரயில் கட்டணங்களை எக்காரணம் கொண்டும் உயர்த்த வேண்டாம்," என அவர் அரசுக்கு கோரிக்கை விடுத்தார்.எதிர்காலத்தில் பயணிகள் மட்டுமன்றி, எரிபொருள் விலையேற்றம் காரணமாக சரக்கு போக்குவரத்திற்கும் (Cargo) வர்த்தகர்கள் ரயில்களையே அதிகம் நாடுவார்கள். எனவே, அதிகரித்து வரும் இந்தக் கேள்வியைச் சமாளிக்க ரயில் பயணங்களின் எண்ணிக்கையை உடனடியாக அதிகரிக்குமாறு அவர் பொறுப்புவாய்ந்த தரப்பினரை வலியுறுத்தினார்.ஏற்கனவே எதிர்க்கட்சிகளான விமல் வீரவன்ச தரப்பு, பொதுஜன பெரமுன மற்றும் ஐக்கிய மக்கள் சக்தி ஆகியவை எரிபொருள் விலை உயர்வைக் கடுமையாக விமர்சித்து வரும் நிலையில், ரயில் நிலைய அதிபர்கள் சங்கத்தின் இந்தத் தகவல் அரசாங்கத்திற்குப் புதிய அழுத்தத்தைக் கொடுத்துள்ளது.