சிகை அலங்காரம், பச்சை குத்தி இருந்தாலே குற்றவாளியா இலங்கையில் புதிய சட்டத்தால் சர்ச்சை இலங்கை அரசாங்கம் புதிதாக முன்மொழிந்துள்ள ஒழுங்கமைக்கப்பட்ட குற்றங்கள் சட்டமூலம், நாட்டில் மனித உரிமைகள் தொடர்பான சீர்திருத்தங்களைப் பலவீனப்படுத்துவதுடன், தன்னிச்சையான கைதுகள் மற்றும் நீண்டகாலத் தடுப்புக்காவல்களுக்கு வழிவகுக்கும் என இலங்கை சட்டத்தரணிகள் சங்கத்தின் முன்னாள் தலைவரும் ஜனாதிபதி சட்டத்தரணியுமான சாலிய பீரிஸ் எச்சரிக்கை விடுத்துள்ளார்.பயங்கரவாதத் தடைச் சட்டத்தை நீக்குவது அல்லது சீர்திருத்துவது தொடர்பில் ஐரோப்பிய ஒன்றியத்திற்கும் சர்வதேச சமூகத்திற்கும் வழங்கப்பட்ட வாக்குறுதிகளை மீறும் வகையில், அரசாங்கம் மற்றுமொரு சட்டத்தின் ஊடாக சர்ச்சைக்குரிய விதிகளை மீண்டும் கொண்டுவர முயற்சிப்பதாகவும் அவர் கவலை வெளியிட்டுள்ளார்.இலங்கையின் பொருளாதாரத்திற்கு முக்கியத்துவம் வாய்ந்த ஐரோப்பிய ஒன்றியத்தின் GSP+ வரிச்சலுகையைத் தக்கவைத்துக்கொள்வதற்காக, பயங்கரவாதத் தடைச் சட்டத்தை நீக்குவது அல்லது சீர்திருத்துவது தொடர்பில் கடந்தகால அரசாங்கங்கள் உறுதிமொழிகளை வழங்கியிருந்ததை அவர் நினைவுபடுத்தியுள்ளார்.பயங்கரவாதத் தடைச் சட்டத்திற்குப் பதிலாக முன்மொழியப்பட்டுள்ள அரசைப் பாதுகாக்கும் பயங்கரவாத எதிர்ப்புச் சட்டமூலத்தில் (PSTA), சிரேஷ்ட பொலிஸ் அதிகாரிகளிடம் வழங்கப்படும் வாக்குமூலங்களை நீதிமன்றச் சாட்சியங்களாக ஏற்றுக்கொள்ளும் நடைமுறை நீக்கப்பட்டுள்ளதாக அவர் சுட்டிக்காட்டியுள்ளார்.இவ்வாறான வாக்குமூலங்களைச் சாட்சியங்களாகப் பயன்படுத்த அனுமதித்தமையே கடந்த காலங்களில் பொலிஸ் மற்றும் பாதுகாப்புத் தரப்பினரால் மேற்கொள்ளப்பட்ட சித்திரவதைகள் உள்ளிட்ட மனித உரிமை மீறல்களுக்கு முக்கிய காரணமாக அமைந்ததாகவும் அவர் தெரிவித்துள்ளார்.எனினும், தற்போது முன்மொழியப்பட்டுள்ள ஒழுங்கமைக்கப்பட்ட குற்றங்கள் சட்டமூலத்தில், உதவிப் பொலிஸ் அத்தியட்சகர் (ASP) மற்றும் அதற்கு மேற்பட்ட தரத்திலுள்ள அதிகாரிகளிடம் பெறப்படும் வாக்குமூலங்களை மீண்டும் நீதிமன்றச் சாட்சியங்களாகப் பயன்படுத்த அனுமதிக்கும் ஏற்பாடுகள் உள்ளதாக சாலிய பீரிஸ் குற்றஞ்சாட்டியுள்ளார்.புதிய சட்டமூலத்தின் கீழ் கைது செய்யப்படும் சந்தேகநபர்கள் மேல் நீதிமன்றத்தின் ஊடாக மாத்திரமே பிணை பெற முடியும் எனவும் அவர் சுட்டிக்காட்டியுள்ளார்.அத்துடன், போதுமான ஆதாரங்கள் இல்லாத சந்தர்ப்பங்களில்கூட சந்தேகநபர்களை விளக்கமறியலில் வைக்க வேண்டிய நிலைக்கு நீதவான்கள் தள்ளப்படக்கூடும் எனவும் அவர் எச்சரித்துள்ளார்.இந்தச் சட்டமூலத்தில் இடம்பெற்றுள்ளதாகக் கூறப்படும் மற்றுமொரு விதி தொடர்பிலும் சாலிய பீரிஸ் கடும் அதிருப்தி வெளியிட்டுள்ளார்.அதன்படி, ஒருவரின் சிகை அலங்காரம், உடலில் காணப்படும் பச்சை குத்தல்கள் அல்லது ஆடை அணியும் விதம் போன்றவற்றைக் கருத்தில் கொண்டு, அவர் ஒழுங்கமைக்கப்பட்ட குற்றக் குழுவைச் சேர்ந்தவரா என்பதை நீதிமன்றங்கள் தீர்மானிக்க வழிவகுக்கும் ஏற்பாடுகள் உள்ளதாக அவர் தெரிவித்துள்ளார்.இத்தகைய விதிகள், தனிநபர்களின் வெளித்தோற்றத்தை மாத்திரம் அடிப்படையாகக் கொண்டு அவர்களைக் கைது செய்வதற்கும் நீண்டகாலம் தடுப்புக்காவலில் வைத்திருப்பதற்கும் வழிவகுக்கும் அபாயம் இருப்பதாக அவர் எச்சரித்துள்ளார்.