ஹோர்முஸ் நீரிணையில் நீடிக்கும் பதற்றம்: அமெரிக்காவிற்கு சவாலான ஈரானின் சிறிய ரகப் படகுகள் மத்திய கிழக்கில் போர்நிறுத்தம் அமுலில் உள்ள நிலையிலும், உலகின் மிக முக்கியமான கடல்வழிப் பாதையான ஹோர்முஸ் நீரிணையில் ஈரான் மற்றும் அமெரிக்கா இடையிலான நேரடி மோதல் போக்கு நீடித்து வருவதாக  தெரியவருகின்றது. ஈரானின் கடற்படைத் தளங்கள் மற்றும் கண்ணிவெடி அமைக்கும் திறன்கள் அழிக்கப்பட்டுவிட்டதாக அமெரிக்க ஜனாதிபதி டொனால்ட் ட்ரம்ப் தெரிவித்து வந்த போதிலும், ஈரானின் சிறிய ரகப் படகுகளின் செயற்பாடுகள் அமெரிக்காவிற்குத் தொடர்ந்து சவாலாக அமைந்துள்ளன.ஈரானின் புரட்சிகர காவல்படை, சிறிய மற்றும் அதிவேகத் தாக்குதல் படகுகளை இந்த மோதலில் முதன்மையாகப் பயன்படுத்துகிறது.கடற்கரையோர சுரங்கங்களில் மறைத்து வைக்கப்பட்டுள்ள இந்தப் படகுகள், அமெரிக்காவின் வான்வழித் தாக்குதல்களிலிருந்து தப்பித்துள்ளன.இவை மிகவேகமாக வந்து தாக்கிவிட்டு, உடனடியாகப் பாதுகாப்பான இடங்களுக்குத் திரும்பும் 'சுவர்மிங்' (Swarming) எனும் தந்திரோபாயத்தைப் பயன்படுத்துகின்றன.அமெரிக்கா தனது துறைமுகங்கள் மீது விதித்துள்ள கடல்சார் முற்றுகைக்குப் பதிலடியாகவும், அமெரிக்கா தனது வாக்குறுதிகளை மீறியுள்ளதாகக் குற்றம் சாட்டியும், ஹோர்முஸ் நீரிணையில் ஈரான் மீண்டும் கடும் கட்டுப்பாடுகளை விதித்துள்ளது.இதன் விளைவாக, நீரிணையைக் கடக்க முயன்ற குறைந்தது இரண்டு வணிகக் கப்பல்கள் மீது சனிக்கிழமையன்று துப்பாக்கிச் சூடு நடத்தப்பட்டதாகத் தகவல்கள் தெரிவிக்கின்றன.மேலும், உலகின் ஒட்டுமொத்த எண்ணெய் ஏற்றுமதியில் 20 சதவீதம் இந்தப் பாதை வழியாகவே நடைபெறுகிறது.அண்மையில் எட்டு எண்ணெய் தாங்கிக் கப்பல்கள் இப்பகுதியைக் கடந்த போதிலும், ஈரான் உடனடியாகத் தனது கட்டுப்பாட்டை அங்கு நிலைநிறுத்தியுள்ளதாகவும் தெரிவிக்கப்படுகின்றது.தற்போது நிலவும் சூழலானது, ஒரு திறந்தவெளிப் போராக இல்லாமல், உலகின் மிக உணர்திறன் வாய்ந்த நீரிணையில் ஒரு "கட்டுப்படுத்தப்பட்ட மோதலாக" உருவெடுத்துள்ளதைச் சமீபத்திய நிகழ்வுகள் காட்டுகின்றன.வான்வழித் தாக்குதல்களுக்குப் பதிலாக, கடல்சார் கட்டுப்பாடு மற்றும் அழுத்தங்கள் மூலம் இரு நாடுகளும் தற்போது மோதி வருகின்றன.