மருந்துகளின் விநியோகத்தை உறுதிப்படுத்த வெளிநாடுகளிடம் ஆதரவு. சுகாதாரம் மற்றும் வெகுஜன ஊடகம் அறிக்கை. மருந்து விநியோகச் சங்கிலியில் இடையூறுகள் குறைக்கப்படும் வரை, பற்றாக்குறையான மருந்துகளைப் பெறுவதற்கு வெளிநாட்டு அரசாங்கங்களிடமிருந்து  நேரடியாக உதவி பெற சுகாதார மற்றும் வெகுஜன ஊடக அமைச்சகம் திட்டமிட்டுள்ளது. இது தொடர்பில் சுகாதாரம் மற்றும் ஊடகத்துறை அமைச்சரின் ஊடகச் செயலாளர் தீப்தி விஜேதுங்கவால்  ஊடகங்களுக்கு அனுப்பப்பட்ட ஊடக அறிக்கையிலே தெரிவிக்கப்பட்டுள்ளது. அந்த அறிக்கையில் மேலும் தெரிவிக்கப்பட்டதாவது, சுகாதாரம் மற்றும் வெகுஜன ஊடக அமைச்சு, இந்தப் பிரச்சினைகளை கோடிட்டு அமைச்சரவைப் பத்திரத்தை அமைச்சரவையில் சமர்ப்பித்தது. மேலும், மேற்படி அமைச்சரவைப் பத்திரத்தை அங்கீகரிக்கும் போது அமைச்சரவை வழங்கிய அறிவுறுத்தல்களின் படி இலங்கை அரசாங்கம் பிற நாடுகளிலிருந்து  மருந்துகளை நேரடியாகப் பெறுவதற்கான வழிமுறைகயின் கீழ் ஒரு முறையான குழுவை நியமித்து எதிர்கால நடவடிக்கைகளைத் தொடங்க  திட்டமிட்டுள்ளது. அந்த வழிமுறையின் கீழ், தேசிய கொள்முதல் ஆணையத்தின் ஒப்புதலைப் பெற்று அமைச்சரவையிடம் மீண்டும் சமர்ப்பிப்பதற்கான ஒரு துரிதப்படுத்தப்பட்ட திட்டம் தற்போது நடைபெற்று வருகிறது. இதன்மூலம் நாட்டின் மருந்து விநியோக வலையமைப்பை மீட்டெடுக்க முடியும். அதன்படி இந்தத் திட்டத்தை மேலும் செயல்படுத்தி நிதி மற்றும் திட்டமிடல் அமைச்சகம், கைத்தொழில் மற்றும் தொழில்முனைவோர் மேம்பாட்டு அமைச்சகம், வர்த்தகம், வணிகம், உணவு மற்றும் கூட்டுறவு அமைச்சகம் வெளியுறவு,வெளிநாட்டு வேலைவாய்ப்பு மற்றும் சுற்றுலா அமைச்சகம் மற்றும் சட்டமா அதிபர் துறை ஆகிய அமைச்சகங்கள் மற்றும் நிறுவனங்களின் மூத்த அதிகாரிகளைக் கொண்ட ஒரு குழு நியமிக்கப்பட்டுள்ளது. இந்தக் குழுவிற்கு சுகாதாரம் மற்றும் ஊடக அமைச்சின் செயலாளர் தலைமை தாங்குகிறார். அதன்படி, இந்தக்குழு நேற்றுமுன்தினம் (29) சுகாதார மற்றும் ஊடக அமைச்சின் செயலாளர் நிபுணர் டாக்டர் அனில் ஜாசிங்க தலைமையில் சுகாதார மற்றும் ஊடக அமைச்சில் கூடியது. அரசாங்கங்களுக்கு இடையிலான ஒத்துழைப்பு மூலம் நாட்டிற்கான மருந்துகளை கொள்முதல் செய்யும் திட்டத்தை எவ்வாறு தொடங்குவது மற்றும் எதிர்காலத்தில் அதை எவ்வாறு செயல்படுத்த வேண்டும் என்பது குறித்து நீண்ட கலந்துரையாடல் இடம்பெற்றது. இந்தத் திட்டத்தின் கீழ் தொடர்புடைய ஆரம்ப நடவடிக்கைகளை விரைவாக முடித்து, இந்நாட்டு குடிமக்களுக்குத் தேவையான நடவடிக்கைகளை எடுக்க சுகாதார மற்றும் வெகுஜன ஊடக அமைச்சகம் திட்டமிட்டுள்ளது. - என்றுள்ளது.