சிறைச்சாலை நெரிசலைக் குறைக்க விரிவான திட்டம் – நாடாளுமன்றக் குழுவில் ஆலோசனை பொது நிர்வாகம், நீதி மற்றும் குடிமைப் பாதுகாப்புக்கான துறைசார் மேற்பார்வைக் குழு, நாட்டின் சிறைச்சாலைகளில் நிலவும் நெரிசல் மற்றும் அதிக கைதி அடர்த்தியைக் குறைப்பதற்கான முறையான திட்டமொன்றைத் தயாரிப்பது தொடர்பாக விரிவான கலந்துரையாடலை நடத்தியுள்ளது.நாடாளுமன்ற உறுப்பினர் கலாநிதி நஜித் இந்திகா தலைமையில் அண்மையில் நாடாளுமன்றத்தில் கூடிய இக்குழு, சிறைச்சாலை நிர்வாகத்தை மேம்படுத்தவும், கைதிகளின் எண்ணிக்கையைக் குறைக்கவும் அரசாங்கம் முன்னெடுத்து வரும் பல்வேறு நடவடிக்கைகள் குறித்து விரிவாக ஆராய்ந்தது.சிறை அதிகாரிகளின் எண்ணிக்கையை அதிகரித்தல், கைதிகளை பிற சிறைச்சாலைகளுக்கு மாற்றுதல், சிறை உள்கட்டமைப்பை மேம்படுத்துதல், அரசாங்கப் பகுப்பாய்வாளர் துறையின் செயல்திறனை உயர்த்துதல், புதிய சட்டத் திருத்தங்களை அறிமுகப்படுத்துதல், நீதிமன்ற நடவடிக்கைகளை விரைவுபடுத்துதல் மற்றும் சமூக சீர்திருத்தங்களை ஊக்குவித்தல் ஆகிய விடயங்கள் முக்கியமாக விவாதிக்கப்பட்டன.மேலும், விஷங்கள், அபின் மற்றும் அபாயகரமான போதைப்பொருட்கள் தொடர்பான அவசரச் சட்டத்தில் திருத்தம் மேற்கொள்ள வேண்டியதன் அவசியம் குறித்தும் குழுவில் கவனம் செலுத்தப்பட்டது. போதைப்பொருள் விற்பனையாளர்கள் மற்றும் போதைப்பொருள் பாவனைக்கு அடிமையானவர்களை தெளிவாக வேறுபடுத்தி அணுக வேண்டியதன் முக்கியத்துவமும் வலியுறுத்தப்பட்டது.குற்றம் சாட்டப்பட்டவர்களை சிறைத்தண்டனைக்கு பதிலாக வீட்டுக் காவலில் வைப்பதற்குத் தேவையான தொழில்நுட்ப வசதிகளை ஏற்படுத்தும் பணிகள் முன்னெடுக்கப்பட்டு வருவதாக நீதி மற்றும் தேசிய ஒருமைப்பாட்டு அமைச்சக அதிகாரிகள் குழுவிற்கு தெரிவித்தனர்.பெண் கைதிகள் மற்றும் அவர்களுடன் சிறைகளில் தங்கியுள்ள ஐந்து வயதுக்குட்பட்ட குழந்தைகளின் நலன் குறித்தும் குழு கவனம் செலுத்தியது. குறிப்பாக, குழந்தைகள் ஐந்து வயதை அடைந்த பின்னர் அவர்களுக்கான பராமரிப்பு மற்றும் நன்னடத்தைக் காவல் ஏற்பாடுகள் தொடர்பிலும் கலந்துரையாடப்பட்டது.மேலும், போதைக்கு அடிமையானவர்களின் மறுவாழ்வு, சமூகத்தில் மீளிணைப்பு, பிணைத்தொகையை செலுத்த முடியாத காரணத்தால் சிறையில் உள்ளவர்களுக்கு மாற்று நடவடிக்கைகள் மேற்கொள்வது உள்ளிட்ட அம்சங்களும் ஆராயப்பட்டன.