40 ஆண்டுகளுக்கு முன்பே ரணிலை கைது செய்திருக்க வேண்டும் பதிலடி கொடுத்த அமைச்சர் முன்னாள் ஜனாதிபதி ரணில் விக்ரமசிங்க 40 ஆண்டுகளுக்கு முன்பே கைது செய்யப்பட்டிருக்க வேண்டும் என்று அமைச்சர் பிமல் ரத்நாயக்க தெரிவித்துள்ளார்.மேலும் அவர் கூறுகையில், ரணிலின் கைதுக்குப் பின்னால் பல  வாதங்கள் உள்ளன. இருப்பினும், 1977 இல் அவரது அரசாங்கம் பாரிய வன்முறையைக் கட்டவிழ்த்துவிட்டிருந்தது. அதற்கு ரணிலும் ஜே.ஆரும் பொறுப்பாளிகள். அந்த நேரத்தில் அவர்கள் கைது செய்யப்பட்டிருக்க வேண்டும்.1980களின் முற்பகுதியில் நடந்த முக்கிய சம்பவங்கள், 1981ல் யாழ்ப்பாண நூலகம் எரிப்பு மற்றும் ஜூலை 1983 கலவரம் உள்ளிட்டவற்றின் போது அமைச்சரவையில் ரணில் விக்கிரமசிங்க வகித்த பங்கிற்கு அவர் பொறுப்புக்கூற வேண்டியிருந்தது.1987 - 1990 க்கு இடையில், அவரது அரசாங்கத்தின் கீழ் 60,000 க்கும் மேற்பட்டோர் கொல்லப்பட்டனர்.  இதற்கான விசாரணைகள் இன்னும் நடந்து வருகின்றன. குறித்த சம்பவங்களில் அவர் கைது செய்யப்பட்டிருக்க வேண்டும். ஆனால் அவரை யாரும் கைது செய்யவில்லை.2015 ஆம் ஆண்டு பிணைமுறி மோசடியில் ரணில் விக்ரமசிங்கவின் தொடர்பு தெளிவாகத் தெரிந்தாலும், அந்த வழக்கிலும் அவர் கைது செய்யப்படவில்லை என்று அவர் மேலும் கூறினார்.எனவே, 40 ஆண்டுகளுக்கு முன்பு நடைபெற்ற பாரிய  குற்றச்சாட்டுகளுக்காக நீதியின் முன் நிறுத்தப்பட்டிருக்க வேண்டிய ஒருவர், இப்போது எங்கள் அரசாங்கத்தின் கீழ் மட்டுமே விசாரிக்கப்படுகிறார்.தற்போதுள்ள விசாரணை அதிகாரிகள் தங்கள் கடமைகளை நேர்மையுடனும் தடையின்றியும் செய்ய முடியும் என்று அவர் மேலும் கூறினார்.