ஈரானின் அடுத்த உச்ச தலைவர் மோஜ்தபா கமேனியா ஈரானின் அடுத்த உச்ச தலைவர் மோஜ்தபா கமேனியா ஈரானின் உச்ச தலைவர் அயதுல்லா அலி கமேனியின் மறைவுக்குப் பிறகு, அடுத்த உச்ச தலைவர் யார் என்பது குறித்த பாரிய விவாதங்கள் எழுந்துள்ளன. வெளிநாட்டு ஊடக அறிக்கைகளின்படி, அலி கமேனியின் இரண்டாவது புதல்வரான மோஜ்தபா கமேனி (Mojtaba Khamenei), ஈரானின் புதிய உச்ச தலைவராகப் பதவியேற்கக்கூடிய முக்கிய வேட்பாளராகக் கருதப்படுகிறார். 56 வயதான மோஜ்தபா கமேனி, 1969 செப்டம்பர் 8 அன்று ஈரானின் மஷாத் நகரில் பிறந்தார். அவர் ஒரு மதப் பின்னணியைக் கொண்டவராக இருந்தபோதிலும், இஸ்லாமிய புரட்சிகர பாதுகாப்புப் படையுடன் (IRGC) நெருக்கமான தொடர்புகளைப் பேணி வருவதாக வெளிநாட்டு ஆய்வாளர்கள் சுட்டிக்காட்டுகின்றனர். மோஜ்தபா கமேனி தனது 17ஆவது வயதில் ஈரான்-ஈராக் போரின் போது இராணுவத்தில் பணியாற்றினார். பின்னர் 1999ஆம் ஆண்டில் அவர் இஸ்லாமிய சட்டம் மற்றும் ஷியா தத்துவ சிந்தனைகள் குறித்த ஆய்வுகளை ஆரம்பித்தார். ஆரம்ப காலங்களில் மதகுருமார்களுக்குரிய உடையில் அவர் தென்படாத போதிலும், தனது 30ஆவது வயதில் முறையான மதக் கல்வியில் இணைந்துகொண்டார். தற்போது அவர் ஒரு நடுத்தர அளவிலான மதகுருவாகக் கருதப்படுகிறார். சமீபத்திய அறிக்கைகளின்படி, மோஜ்தபா "அயதுல்லா" என்ற பெயரால் அழைக்கப்படத் தொடங்கியுள்ளார். இது அவர் ஈரானின் உச்ச தலைவர் பதவிக்கு முன்னிறுத்தப்படுவதற்கான ஒரு முன்னோடியாகக் கருதப்படுகிறது. 2009ஆம் ஆண்டு ஜனாதிபதி தேர்தலின் போது ஏற்பட்ட போராட்டங்களை ஒடுக்குவதில் மோஜ்தபா கமேனி பின்னணியில் இருந்து செயற்பட்டதாக வெளிநாட்டு ஊடகங்கள் தெரிவிக்கின்றன. இருப்பினும், அவர் பகிரங்க ஊடகங்களில் தோன்றுவது மிகவும் குறைவாகவே உள்ளது. 2000ஆம் ஆண்டில் விக்கிலீக்ஸ் (WikiLeaks) இணையதளம், அவரை 'மதகுரு அங்கிகளுக்கு பின்னால் இருக்கும் அதிகாரமிக்க நபர்' என வர்ணித்திருந்தது. ஈரானின் உச்ச தலைவரைத் தேர்ந்தெடுக்கும் அதிகாரம் 'நிபுணர்கள் சபை'க்கு (Assembly of Experts) உள்ளது. புதிய உச்ச தலைவராக வருபவர் இஸ்லாமிய சட்டம் குறித்த உயரிய அறிவையும் அரசியல் தலைமைத்துவ ஆற்றலையும் கொண்டிருக்க வேண்டும். நிபுணர்கள் சபை இரகசியக் கலந்துரையாடல்கள் மற்றும் வாக்கெடுப்பு மூலம் புதிய தலைவரைத் தேர்ந்தெடுக்கும். தந்தையிடமிருந்து மகனுக்கு அதிகாரம் நேரடியாக மாற்றப்படுவது ஈரானின் புரட்சிகரக் கொள்கைகளுக்கு முரணாக அமையலாம் என விமர்சகர்கள் சுட்டிக்காட்டுகின்றனர். மேலும், அவர் இன்னும் மிக உயரிய மத நிலையை எட்டவில்லை என்றாலும், அவரது அரசியல் செல்வாக்கும் பாதுகாப்புத் துறைத் தொடர்புகளும் அவருக்கு பலத்தை வழங்குகின்றன. ஈரானின் முதலாவது உச்ச தலைவராக ரூஹொல்லா கொமேனி (Ruhollah Khomeini) இருந்தார். அவரது மறைவுக்குப் பிறகு 1989ஆம் ஆண்டில் அயதுல்லா அலி கமேனி அந்தப் பதவிக்கு நியமிக்கப்பட்டார். இன்று, மோஜ்தபா கமேனியின் தலைமைத்துவ முன்னெடுப்பானது ஈரானிய அரசு முறைமை, மத அதிகாரம் மற்றும் புரட்சிகரக் கொள்கைகளுக்கு இடையிலான சிக்கலான தொடர்புகளை வெளிப்படுத்தும் முக்கிய காரணியாகப் பார்க்கப்படுகிறது.