சிறார்கள் சமூக ஊடகங்களைப் பயன்படுத்த தடை விதித்த நாடு எது தெரியுமா சிறார்கள் சமூக ஊடகங்களை அணுகுவதைக் கட்டுப்படுத்தவும், வன்முறை அல்லது சட்டவிரோத உள்ளடக்கங்களைப் பார்ப்பதைத் தடுக்கவும் பிரேசில் நேற்று புதிய நடவடிக்கைகளைச் செயல்படுத்தத் தொடங்கியது.இன்ஸ்டாகிராமில் சிறார்கள் பாலியல் ரீதியாகச் சுரண்டப்பட்டதாகக் கூறப்படும் சர்ச்சையைத் தொடர்ந்து, குழந்தைகள் சமூக ஊடகங்களைப் பயன்படுத்துவதை ஒழுங்குபடுத்தும் சட்டம் கடந்த ஆண்டு அங்கீகரிக்கப்பட்டு, இந்த வாரம் அமலுக்கு வருகிறது.அதிதீவிரமாக இணைக்கப்பட்ட 21.2 கோடி மக்கள் தொகை கொண்ட இந்த தேசம், அடிமையாக்கும் சமூக ஊடக வழிமுறைகளிலிருந்து குழந்தைகளைப் பாதுகாக்க முயலும் பல நாடுகளுடன் இணைகிறது.ஆஸ்திரேலியா போன்ற சில நாடுகள் அணுகலை அடியோடு தடை செய்துள்ளன, மற்றவை வலுவான வயது சரிபார்ப்பு நடவடிக்கைகளையோ அல்லது பெற்றோரின் சம்மதத்தையோ கோருகின்றன.பிரேசிலில், 16 வயது வரையிலான இளம் பருவத்தினர் இனி தங்கள் கணக்குகளை ஒரு சட்டப்பூர்வ பாதுகாவலரின் கணக்குகளுடன் இணைக்க வேண்டும்.18 வயதுக்குட்பட்ட சிறார்கள், ஆபாசம் அல்லது வன்முறை போன்ற தடைசெய்யப்பட்ட அல்லது பொருத்தமற்ற உள்ளடக்கங்களை அணுகுவதைத் தடுப்பதற்காக, டிஜிட்டல் தளங்கள் 'நம்பகமான' வயது சரிபார்ப்பைக் கோர வேண்டும்."வயது சரிபார்ப்பு வழிமுறையாகப் பயன்படுத்தப்படும் சுய-அறிவிப்பு பயனற்றது என்பதால், எங்கள் சட்டம் அதனைத் தடை செய்துள்ளது," என்று அச்சட்டத்தை அமல்படுத்தும் அரசு அமைப்பான தேசிய தரவுப் பாதுகாப்பு ஆணையத்தின் (ANPD) இயக்குநர் இயேஜ் மியோலா கூறினார்.அந்த இயங்குமுறை எவ்வாறு செயல்படும் என்பது குறித்த விவரங்கள் இன்னும் வெளியிடப்படவில்லை.செவ்வாய்க்கிழமை முதல் ஒரு “இடைக்காலம்” தொடங்கும், இந்தக் காலகட்டத்தில் ANPD சட்டத்தின் தொழில்நுட்ப அம்சங்களை விவரிக்கும்.தொழில்நுட்ப நிறுவனங்களின் பிரதிநிதிகளை சந்தித்து அவர்களின் முன்மொழிவுகளை மதிப்பாய்வு செய்ததாக மியோலா கூறினார்.தற்போதைக்கு, பயனர்கள் அடையாள ஆவணத்தைப் பதிவேற்றி, பயோமெட்ரிக் புகைப்படச் சரிபார்ப்பை வழங்குவதே விரும்பப்படும் சரிபார்ப்பு முறையாகும் என்று அவர் கூறினார்.பாலியல் சுரண்டல் அல்லது துஷ்பிரயோகத்தை சித்தரிப்பதாகத் தோன்றும் உள்ளடக்கத்தை டிஜிட்டல் தளங்கள் அகற்ற வேண்டும் என்றும், பிரேசிலிய அதிகாரிகளுக்குத் தெரிவிக்க வேண்டும் என்றும் அந்தச் சட்டம் வலியுறுத்துகிறது.புதிய விதிமுறைகளுக்கு இணங்கத் தவறும் நிறுவனங்கள், 50 மில்லியன் ரியால் வரையிலான அபராதம் மற்றும் கணக்கு இடைநீக்கம் முதல், மீண்டும் மீண்டும் இணங்காத நேர்வுகளில் முழுமையான “தடை” வரையிலான தண்டனைகளை எதிர்கொள்கின்றன.குழந்தைகள் மற்றும் இளம் பருவத்தினரை இலக்காகக் கொண்ட விளம்பரங்களையும், பயனர்கள் பணம் செலுத்தி ஆச்சரிய வெகுமதியைப் பெறும் வீடியோ கேம்களுக்குள் இருக்கும் 'லூட் பாக்ஸ்கள்' எனப்படும் பொருட்களையும் இந்தச் சட்டம் தடை செய்கிறது."மற்ற நாடுகளைப் போலல்லாமல், பிரேசில் குழந்தைகளுக்கான சமூக ஊடகங்களை ஒழுங்குபடுத்துவதோடு மட்டும் நின்றுவிடாமல், முழு இணையத்தையும் உள்ளடக்கிய ஒரு சட்டத்தைத் தேர்ந்தெடுத்துள்ளது," என்று கெடுலியோ வர்காஸ் அறக்கட்டளையின் பேராசிரியரான ரெனாட்டா டோமாஸ், ஏஎஃப்‌பி செய்தி நிறுவனத்திடம் கூறினார்.