சீனாவின் உயர் ராணுவ அதிகாரி விசாரணையில் - சீனாவின் இராணுவத் தலைமை கொந்தளிப்பு சீனாவின் மிக உயர்மட்ட ராணுவ அதிகாரிகளில் ஒருவரும், ஜனாதிபதி ஜி ஜின்பிங்கின் நெருங்கிய கூட்டாளியுமான ஜாங் யூக்ஸியா மீது “கடுமையான ஒழுக்க மற்றும் சட்ட மீறல்கள்” குறித்த விசாரணை தொடங்கப்பட்டுள்ளதாக சீனா அறிவித்துள்ளது. மக்கள் விடுதலை இராணுவத்தின் (PLA) உச்ச அதிகார அமைப்பான மத்திய இராணுவ ஆணையத்தின் (CMC) கூட்டுத் துணைத் தலைவராக இருந்த ஜாங், ஜி-க்கு அடுத்தபடியாக முக்கியமான பதவியில் இருந்தவர். அவருடன் சேர்த்து CMC-யின் கூட்டுப் பணியாளர் துறையின் தலைமைப் பணியாளர் லியு ஜென்லியும் விசாரணைக்கு உட்படுத்தப்பட்டுள்ளதாக பாதுகாப்பு அமைச்சகம் தெரிவித்துள்ளது.இராணுவத்தின் அதிகாரப்பூர்வ செய்தித்தாளான வெளியிட்ட தகவலின்படி, ஜாங் மற்றும் லியு கம்யூனிஸ்ட் கட்சியின் நம்பிக்கையை துரோகம் செய்ததாகவும், அரசியல் மற்றும் ஊழல் பிரச்சினைகள் மூலம் இராணுவத்தின் மீதான கட்சியின் முழுமையான தலைமையை பாதித்ததாகவும் கடுமையாக விமர்சிக்கப்பட்டுள்ளது. இதேவேளை, நாட்டின் அணு ஆயுதத் திட்டம் தொடர்பான தகவல்களை அமெரிக்காவுக்கு கசியவிட்டதாகவும், பதவி உயர்வுகளுக்காக லஞ்சம் பெற்றதாகவும் ஜாங் மீது குற்றச்சாட்டுகள் உள்ளதாக வெளிநாட்டு ஊடகங்கள் செய்தி வெளியிட்டுள்ளன. 75 வயதான ஜாங், ஓய்வு பெறும் வயதைத் தாண்டியும் ஜி ஜின்பிங்கின் நம்பிக்கையால் பதவியில் தொடர அனுமதிக்கப்பட்டவர். 2012 முதல் ஜி தொடங்கிய ஊழல் ஒழிப்பு நடவடிக்கைகளில் இராணுவமே முக்கிய இலக்காக இருந்து வந்த நிலையில், இப்போது ஜாங் போன்ற மூத்த மற்றும் சக்திவாய்ந்த நபர் விசாரணையில் சிக்கியிருப்பது சீன ராணுவத் தலைமையின் ஸ்திரத்தன்மை குறித்து கேள்விகளை எழுப்பியுள்ளது. குறிப்பாக, தைவான், தென் சீனக் கடல் மற்றும் கிழக்கு சீனக் கடல் போன்ற பகுதிகளில் சீனா கடுமையான ராணுவ நிலைப்பாட்டை எடுத்துள்ள காலகட்டத்தில் இந்த விசாரணை பெரும் கவனத்தை ஈர்த்துள்ளது.இந்த சுத்திகரிப்பு நடவடிக்கைகள் சீனாவின் அணுசக்தி வல்லரசாகும் முயற்சிக்கும், இராணுவ நவீனமயமாக்கல் திட்டங்களுக்கும் அரசியல் அழுத்தங்களை உருவாக்கக்கூடும் என  வெளிநாட்டு பாதுகாப்பு ஆய்வாளர்கள் கருதுகின்றனர். மொத்தத்தில், ஜாங் யூக்ஸியா மீதான விசாரணை சீன ராணுவத்திற்குள் நடக்கும் மிகப் பெரிய அரசியல் மாற்றங்களின் அடையாளமாக பார்க்கப்படுகிறது.