பேலியாகொடை மீன் சந்தையில் விலை அதிரடி வீழ்ச்சி 50% வரை குறைந்த மீன் விலைகள் இந்நாட்களில் பேலியாகொடை பிரதான மத்திய மீன் சந்தையின் நடவடிக்கைகள் மிகவும் சுறுசுறுப்படைந்துள்ளன. நாட்டின் பல்வேறு பகுதிகளிலிருந்தும், குறிப்பாய் தெற்கு மாகாணக் கடற்றொழில் மூலமும் அதிகளவிலான மீன்,  சந்தைக்கு வரத் தொடங்கியுள்ளதால், அனைத்து வகையான மீன்களின் மொத்த மற்றும் சில்லறை விலைகள் கடந்த மாதங்களுடன் ஒப்பிடுகையில் சுமார் 50 சதவீதம் வரை குறிப்பிடத்தக்க மட்டத்தில் குறைவடைந்துள்ளன.இந்தத் திடீர் விலை வீழ்ச்சி நுகர்வோருக்குப் பெரும் ஆறுதலாக அமைந்துள்ளது. சத்தான உணவு வேளையொன்றைக் குறைந்த செலவில் தயாரித்துக்கொள்வதற்குத் தமக்குக் கிடைத்த பெரும் நிவாரணம் இது எனத் தெரிவிக்கும் நுகர்வோர், நாளாந்தம் மீன் கொள்வனவு செய்ய சந்தைக்கு வரும் மக்களின் எண்ணிக்கையும் கணிசமாக அதிகரித்துள்ளதாகச் சுட்டிக்காட்டுகின்றனர்.சந்தையில் பலயா மீன் கிலோ ஒன்று 400 முதல் 650 ரூபாய் வரையிலும், சாலையா மீன் 200 முதல் 450 ரூபாய் வரையிலும், லின்னா மீன் 550 முதல் 700 ரூபாய் வரையிலும் விற்கப்படுகின்றன. மேலும் ஹுருல்லா, பாறை, குமபிலாவ, கெலவல்லா மற்றும் தலபத் போன்ற அனைத்து வகையான மீன்களின் விலைகளும் பெருமளவில் வீழ்ச்சியடைந்துள்ளன.வெளிச் சந்தைகள் மற்றும் தூரப் பிரதேசச் சந்தைகளுடன் ஒப்பிடுகையில், பேலியாகொடை சந்தையில் மீன்களைக் குறைந்த விலையில் பெற முடிவதாக ரத்தினபுரி, அவிசாவளை போன்ற பகுதிகளிலிருந்து வருகை தந்த கொள்வனவாளர்களும் வியாபாரிகளும் மகிழ்ச்சி தெரிவிக்கின்றனர்.மறுபுறம், இந்த நிலைமை மீன் வியாபாரிகளுக்கும் புதிய நம்பிக்கையைச் சேர்த்துள்ளது. அதிக விலை காரணமாக முடங்கிப்போயிருந்த தமது வர்த்தக நடவடிக்கைகள் மீண்டும் உயிர்பெற்றுள்ளதாகக் கூறும் பேலியாகொடை மீன் வியாபாரிகள் சங்கப் பிரதிநிதிகள் மற்றும் வர்த்தகர்கள், மீன் விலை குறைந்தமையால் நுகர்வோரின் ஈர்ப்பு அதிகரித்துள்ளதுடன், அதன் மூலம் தமது நாளாந்த விற்பனை அளவும் வருமானமும் வளர்ச்சியடைந்துள்ளதாகக் குறிப்பிடுகின்றனர். இந்த நியாயமான மற்றும் மலிவான விலை மட்டம் தொடர்ந்தும் நிலைத்திருந்தால் தொழில்துறைக்கும் ஒட்டுமொத்த மக்களுக்கும் பெரும் நிவாரணமாக அமையும் என்றும் அவர்கள் சுட்டிக்காட்டுகின்றனர்.