ஹன்டா வைரஸ் அச்சப்படத் தேவையில்லை- உலக சுகாதார ஸ்தாபனம் தலைவர் தெரிவிப்பு சொகுசு கப்பலில் பரவிய ஹன்டா வைரஸ் உலகையே அச்சத்தில் ஆழ்த்தியிருந்த நிலையில், இப்போது உலக சுகாதார ஸ்தாபனம் (WHO) இது குறித்து ஒரு முக்கியமான விளக்கத்தை அளித்துள்ளது. "பெரிய அளவிலான பரவலுக்கு வாய்ப்பில்லை" என்று WHO தலைவர் டெட்ரோஸ் அதானோம் கெப்ரேயஸ் தெரிவித்துள்ளார். மட்ரிட்டில் நடந்த செய்தியாளர் சந்திப்பில் அவர் வெளியிட்ட அதிரடித் தகவல்கள் இதோஸ்பெயினின் டெனெரிஃப் தீவிலிருந்து நெதர்லாந்தின் ராட்டர்டாம் நோக்கிப் புறப்பட்ட எம்.வி. ஹொண்டியஸ் (MV Hondius) என்ற சொகுசு கப்பலில்தான் இந்தத் தொற்று கண்டறியப்பட்டது.இதுவரை இந்தக் கப்பலில் பயணம் செய்த மூன்று பேர் உயிரிழந்துள்ளனர்.தற்போது வரை மொத்தம் ஏழு பேருக்கு ஹன்டா வைரஸ் தொற்று இருப்பது உறுதி செய்யப்பட்டுள்ளது. இதில் ஒரு அமெரிக்கர் மற்றும் ஒரு பிரெஞ்சு நாட்டவரும் அடங்குவர்.கப்பலில் இருந்த எஞ்சிய பயணிகள் தற்போது வெளியேற்றப்பட்டுள்ளனர். 28 பயணிகள் குழுவுடன் இரண்டு விமானங்கள் நேற்று நெதர்லாந்தின் ஐந்தோவன் (Eindhoven) நகரில் தரையிறங்கின. வைரஸ் பரவாமல் தடுக்கப் பயணிகள் அனைவரும் தீவிரக் கண்காணிப்பில் வைக்கப்பட்டுள்ளனர்.இருப்பினும், நெதர்லாந்தில் உள்ள ஒரு மருத்துவமனையில் தொற்று பாதித்த ஒருவருக்குச் சிகிச்சை அளித்த 12 ஊழியர்கள் தற்போது முன்னெச்சரிக்கை நடவடிக்கையாகத் தனிமைப்படுத்தப்பட்டுள்ளனர். இது மருத்துவமனை ஊழியர்களிடையே சிறிய பதற்றத்தை ஏற்படுத்தியுள்ளது."தற்போதுள்ள நிலவரப்படி பெரிய அளவிலான சமூகப் பரவலுக்கு அறிகுறி இல்லை" என உலக சுகாதார ஸ்தாபனம்  தலைவர் கூறி மக்களுக்கு ஆறுதல் அளித்துள்ளார். ஆனால், அதே சமயம் ஒரு எச்சரிக்கையையும் விடுத்துள்ளார்:"நிலைமை எப்போது வேண்டுமானாலும் மாறக்கூடும். வெளியேற்றப்பட்ட பயணிகளில் மேலும் சிலருக்குத் தொற்று உறுதி செய்யப்பட வாய்ப்புள்ளது. எனவே நாம் மிகவும் விழிப்புடன் இருக்க வேண்டும்."என அவர் தெரிவித்துள்ளார்.ஹன்டா வைரஸ் என்பது பொதுவாக எலிகள் மூலம் பரவும் ஒன்று என்பதால், சொகுசு கப்பலுக்குள் இந்த வைரஸ் எப்படி வந்தது என்பது குறித்துத் தொடர்ந்து ஆய்வுகள் நடக்கின்றன. இது ஒரு புதிய சவாலாக உருவெடுத்தாலும், உலக சுகாதார ஸ்தாபனம் நிலைமையைக் கட்டுக்குள் வைத்துள்ளதாகத் தெரிகிறது.