ஐரோப்பிய நாடுகளில் வேலை; அம்பலமான பாரிய மோசடி சிக்கிய இருவர் ஐரோப்பிய நாடுகளில் வேலை வாங்கித் தருவதாகக் கூறி சுமார் இரண்டு மில்லியன் ரூபாய் மோசடியில் ஈடுபட்ட இரண்டு நபர்கள், இலங்கை வெளிநாட்டு வேலைவாய்ப்பு பணியகத்தின் விசேட புலனாய்வுப் பிரிவின் அதிகாரிகளால் கைது செய்யப்பட்டுள்ளனர்.வெளிநாட்டு வேலைவாய்ப்புத் துறையில் பல வருட அனுபவம் கொண்ட மாவனல்லையில் வசிக்கும் ஒருவரும், கடவத்தையைச் சேர்ந்த ஓய்வுபெற்ற இராணுவ கர்னலுமே இவ்வாறு கைது செய்யப்பட்டுள்ளனர்.நீர்கொழும்பு பகுதியில் சுமார் ஒன்றரை ஆண்டுகளாக பணியகத்தில் பதிவுசெய்யப்பட்ட வேலைவாய்ப்பு நிறுவனமாக இயங்கி வந்த FC International, ஹங்கேரி, நெதர்லாந்து மற்றும் பின்லாந்து போன்ற நாடுகளில் செவிலியர் துறையில் வேலைகளை வழங்குவதாக உறுதியளித்து, நாட்டின் பல்வேறு பகுதிகளில் வசிக்கும் நபர்களிடமிருந்து பணம் வசூலித்து வந்துள்ளது. இருப்பினும், பணம் வசூலிக்கப்பட்ட பிறகு வாக்குறுதியளித்தபடி தொழில்கள் வழங்கப்படவில்லை என்பதாக 20 முறைப்பாடுகள் பணியகத்திற்குக் கிடைத்துள்ளன.அதிகாரிகள் நடத்திய விசாரணையில், சம்பந்தப்பட்ட வேலைவாய்ப்பு நிறுவனத்திற்கு ஹங்கேரிக்கு மட்டுமே வேலைவாய்ப்புகள் கிடைத்துள்ளதாகவும், அவற்றில் செவிலியர் துறை வேலைகள் இல்லை என்பதும் தெரியவந்தது.இந்தக் கைது குறித்த தகவல் வெளியான பிறகு, சம்பந்தப்பட்ட வேலைவாய்ப்பு நிறுவனத்தின் உரிமையாளர், அவரது கணவர் மற்றும் நிறுவனத்தின் நிதிக்குப் பொறுப்பான மேலாளர் ஆகியோர் விசாரணை அதிகாரிகளிடமிருந்து தலைமறைவாகியுள்ளனர். அவர்களைக் கைது செய்ய மேலும் விசாரணைகள் நடத்தப்பட்டு வருகின்றன.கைது செய்யப்பட்ட சந்தேக நபர்கள் நீர்கொழும்பு நீதவான் நீதிமன்றத்தில் ஆஜர்படுத்தப்பட்ட பின்னர், நாளை  வரை விளக்கமறியலில் வைக்கப்பட்டுள்ளனர். மேலும், விசாரணை அதிகாரிகளிடமிருந்து தலைமறைவாக இருக்கும் நபர்களுக்கு பயணத் தடை விதிக்கவும் நீதவான் உத்தரவிட்டுள்ளார்.