70 கி.மீ. வேகத்தில் பலத்த காற்று; கடற்பரப்புகளுக்கு சிவப்பு எச்சரிக்கை மண்சரிவு அபாயம் நீடிப்பு நாட்டில் நிலவும் மழையுடனான சீரற்ற வானிலை காரணமாக, நான்கு மாவட்டங்களில் விடுக்கப்பட்டிருந்த மண்சரிவு எச்சரிக்கையை புதுப்பிக்க தேசிய கட்டட ஆராய்ச்சி நிறுவனம் நடவடிக்கை எடுத்துள்ளது.இதன்படி, இன்று (08) காலை 9 மணி முதல் நாளை (09) காலை 9 மணி வரையான 24 மணித்தியாலங்களுக்கு மண்சரிவு எச்சரிக்கை அமுலில் இருக்கும் என அறிவிக்கப்பட்டுள்ளது.இரண்டாம் மட்ட மண்சரிவு எச்சரிக்கை கண்டி மாவட்டத்தின் பஸ்பாகே கோரள பகுதியிலும், நுவரெலியா மாவட்டத்தின் கொத்மலை மேற்கு, நுவரெலியா, கொத்மலை கிழக்கு, நோர்வூட், அம்பகமுவ மற்றும் தலவாக்கலை ஆகிய பகுதிகளிலும் விடுக்கப்பட்டுள்ளது.முதலாம் மட்ட மண்சரிவு எச்சரிக்கை கண்டி மாவட்டத்தின் தெல்தொட்ட, உடுதும்பர, ஆற்று மேற்படுக்கை, உடபலாத, பன்வில, தொலுவ மற்றும் மெததும்பர ஆகிய பகுதிகளுக்கும்,கேகாலை மாவட்டத்தின் புலத்கோஹூப்பிட்டிய, அரநாயக்க, தெஹியோவிட்ட, யட்டியந்தோட்டை மற்றும் தெரணியகல ஆகிய பகுதிகளுக்கும்,இரத்தினபுரி மாவட்டத்தின் இம்புல்பே, ஓபநாயக்க மற்றும் இரத்தினபுரி ஆகிய பகுதிகளுக்கும் விடுக்கப்பட்டுள்ளது.மண்சரிவு எச்சரிக்கை விடுக்கப்பட்டுள்ள பகுதிகளில் வசிக்கும் மக்கள் மண்சரிவு அபாயம் தொடர்பில் மிகுந்த அவதானத்துடன் செயற்படுமாறும், நிலைமை மோசமடையும் பட்சத்தில் பாதுகாப்பான இடங்களுக்கு செல்ல தயாராக இருக்குமாறும் அறிவுறுத்தப்பட்டுள்ளனர்.இதேவேளைபுத்தளம் ஊடாக சிலாபத்தில் இருந்து மன்னார் வரையான கடற்பரப்புகளுக்கும், ஹம்பாந்தோட்டை ஊடாக மாத்தறையில் இருந்து பொத்துவில் வரையான கடற்பரப்புகளுக்கும் பலத்த காற்று மற்றும் கொந்தளிப்பான கடல்நிலை குறித்து வளிமண்டலவியல் திணைக்களம் "சிவப்பு" எச்சரிக்கையை விடுத்துள்ளது.இன்றைய தினம் (08) விடுக்கப்பட்டுள்ள இந்த எச்சரிக்கை, நாளை (09) காலை 8.30 மணி வரை அமுலில் இருக்கும் என தெரிவிக்கப்பட்டுள்ளது.இதன்படி, புத்தளம் ஊடாக சிலாபத்தில் இருந்து மன்னார் வரையான மற்றும் ஹம்பாந்தோட்டை ஊடாக மாத்தறையில் இருந்து பொத்துவில் வரையான கடற்பரப்புகள் அவ்வப்போது மிகவும் கொந்தளிப்பாகக் காணப்படும் மற்றும் மணித்தியாலத்திற்கு 60 முதல் 70 கிலோமீற்றர் வரை பலத்த காற்று வீசக்கூடும்.எனவே மறு அறிவித்தல் வரை இந்தக் கடற்பரப்புகளுக்குச் செல்ல வேண்டாம் என கடற்படையினர் மற்றும் மீனவர் சமூகத்தினருக்கு அறிவுறுத்தப்பட்டுள்ளது.இதற்கிடையில், திருகோணமலை மற்றும் காங்கேசன்துறை ஊடாக மட்டக்களப்பில் இருந்து மன்னார் வரையான மற்றும் கொழும்பு மற்றும் காலி ஊடாக சிலாபத்தில் இருந்து மாத்தறை வரையான கடற்பரப்புகள் அவ்வப்போது கொந்தளிப்பாகக் காணப்படும் எனவும், அங்கு மணித்தியாலத்திற்கு 50 முதல் 60 கிலோமீற்றர் வரை பலத்த காற்று வீசக்கூடும் எனவும் அதில் மேலும் குறிப்பிடப்பட்டுள்ளது.மேலும், மேற்கண்ட கடற்பரப்புகளில் மீன்பிடி மற்றும் கடற்படை நடவடிக்கைகளில் ஈடுபட்டுள்ள கடற்படையினர் மற்றும் மீன்பிடி சமூகத்தினர் மிகவும் அவதானமாக இருக்குமாறும், வளிமண்டலவியல் திணைக்களம் இது தொடர்பாக வெளியிடும் எதிர்கால முன்னறிவிப்புகளைக் கவனிக்குமாறும் கேட்டுக்கொள்ளப்பட்டுள்ளனர்.