இந்த ஆண்டில் இதுவரை வீதி விபத்துகளில் 1,424 பேர் உயிரிழப்பு அதிர்ச்சி புள்ளிவிவரம் இந்த ஆண்டு இதுவரை நாட்டில் இடம்பெற்ற வீதி விபத்துகளில் மொத்தம் 1,424 பேர் உயிரிழந்துள்ளதாக இலங்கை பொலிஸார் தெரிவித்துள்ளனர்.தேசிய விபத்துத் தடுப்பு வாரத்தை முன்னிட்டு அரச தகவல் திணைக்களத்தில் நடைபெற்ற ஊடக சந்திப்பில், போக்குவரத்து கட்டுப்பாடு மற்றும் வீதிப் பாதுகாப்பு பணிப்பாளரும் சிரேஷ்ட பொலிஸ் அத்தியட்சருமான மனோஜ் ரணகலா இந்த தகவலை வெளியிட்டார்.அவரின் கூற்றுப்படி, 2026 ஜனவரி 1 முதல் ஜூலை 5 வரை உயிரிழப்பை ஏற்படுத்திய 1,355 வீதி விபத்துகள் பதிவாகியுள்ளன.2025 ஆம் ஆண்டின் இதே காலப்பகுதியுடன் ஒப்பிடுகையில், இந்த ஆண்டு வீதி விபத்துகளின் எண்ணிக்கை 108-ஆலும், உயிரிழப்புகளின் எண்ணிக்கை 110-ஆலும் அதிகரித்துள்ளதாக அவர் குறிப்பிட்டார்.இந்த நிலைமை மிகவும் கவலைக்குரியது எனத் தெரிவித்த அவர், சாரதிகளின் கவனக்குறைவு, பொறுப்பற்ற வாகன ஓட்டம், அதிவேகம், மோசமான வீதி நிலைமைகள் மற்றும் வாகனங்களை முறையாகப் பராமரிக்காததால் ஏற்படும் இயந்திரக் கோளாறுகள் ஆகியவையே விபத்துகள் அதிகரிப்பதற்கான பிரதான காரணங்கள் என சுட்டிக்காட்டினார்.மேலும், வீதி விபத்துகளில் உயிரிழப்பவர்களில் பாதசாரிகள் மற்றும் மோட்டார் சைக்கிள் ஓட்டுநர்களே அதிகளவில் உள்ளதாகவும் தெரிவித்தார்.பொலிஸாரின் புள்ளிவிவரங்களின்படி, இந்த ஆண்டில் இதுவரை 488 மோட்டார் சைக்கிள் சாரதிகளும், 484 பாதசாரிகளும் வீதி விபத்துகளில் உயிரிழந்துள்ளனர்.