ஏவுதளத்தில் கடும் குளிர்: விண்வெளி வீரர்களுடன் முதல் ஆர்ட்டெமிஸ் சந்திரப் பயணம் தாமதம் ஏவுதளப் பகுதியில் நிலவும் கடுமையான குளிர் நிலை காரணமாக, விண்வெளி வீரர்களுடன் மேற்கொள்ளப்படவிருந்த முதல் ஆர்ட்டெமிஸ் சந்திரப் பயணத்தை (Artemis Moon Mission) நாசா தற்காலிகமாக தாமதப்படுத்தியுள்ளது.ஏவுதளத்தில் எதிர்பார்க்கப்படும் வெப்பநிலை உறைபனிக்கு அருகில் குறையும் என வானிலை முன்னறிவிப்பு தெரிவிப்பதால், இந்த முடிவு எடுக்கப்பட்டுள்ளதாக நாசா அதிகாரிகள் தெரிவித்துள்ளனர். இதன் காரணமாக, குழுவினருடன் நடைபெறவிருந்த ஆர்ட்டெமிஸ் மூன்ஷாட் தற்போது பிப்ரவரி 8-க்கு முன்னதாக இல்லை என அறிவிக்கப்பட்டுள்ளது. இது ஆரம்ப திட்டத்தை விட இரண்டு நாட்கள் தாமதம் ஆகும்.இன்று நடைபெற இருந்த 322 அடி (98 மீட்டர்) உயரமுள்ள நிலவு ராக்கெட்டின் எரிபொருள் நிரப்பும் சோதனை கடும் குளிர் காரணமாக வியாழக்கிழமை தாமதமாக ரத்து செய்யப்பட்டது.வானிலை அனுகூலமாக இருந்தால், இந்த முக்கியமான ஒத்திகை திங்கட்கிழமை நடத்தப்படும் என நாசா தெரிவித்துள்ளது.இந்த மாற்றங்களால், பிப்ரவரி மாதத்தில் நாசாவிற்கு மூன்று நாட்கள் மட்டுமே ஏவுதலுக்கான வாய்ப்பு கிடைத்துள்ளது. அந்த காலக்கெடுவில், நான்கு விண்வெளி வீரர்களை சந்திரனைச் சுற்றி வந்து மார்ச் மாதத்திற்குள் பூமிக்குத் திரும்பச் செய்வதே இலக்காக உள்ளது.“கூடுதல் தாமதங்கள் ஏற்பட்டால், ஏவுதல் தேதி ஒரு நாளுக்கு ஒரு நாள் மாற்றப்படலாம்,” என்று நாசா நேற்று வெளியிட்ட அறிக்கையில் தெரிவித்துள்ளது.ராக்கெட்டின் மேல் அமைந்துள்ள ஓரியன் விண்கலம் (Orion Capsule) ஹீட்டர்களால் சூடாக வைக்கப்பட்டுள்ளதாகவும், ராக்கெட்டின் பிற அமைப்புகளும் குளிர் நிலைக்கு ஏற்ப மாற்றியமைக்கப்பட்டுள்ளதாகவும் அதிகாரிகள் கூறினர்.இந்தப் பயணத்தின் கமாண்டர் ரீட் வைஸ்மேன் மற்றும் அவரது குழுவினர் தற்போது ஹூஸ்டனில் தனிமைப்படுத்தலில் உள்ளனர்.அவர்கள் எப்போது புளோரிடாவில் உள்ள கென்னடி விண்வெளி மையத்திற்கு வருவார்கள் என்பது இன்னும் உறுதி செய்யப்படவில்லை.அரை நூற்றாண்டுக்கும் மேலான இடைவெளிக்குப் பிறகு, மனிதர்களை சந்திரனுக்கு அனுப்பும் முதல் பயணம் இதுவாகும். இதற்கு முன், 1972 ஆம் ஆண்டு அப்பல்லோ 17 திட்டத்துடன் நாசாவின் மனிதர் சந்திரப் பயணங்கள் முடிவடைந்தன.இதற்கிடையில், சர்வதேச விண்வெளி நிலையத்திற்கு புதிய குழுவினரை அனுப்ப வேண்டிய அவசியம் திட்டத்தை மேலும் சிக்கலாக்கியுள்ளது. முந்தைய குழுவினர் மருத்துவ காரணங்களால் முன்கூட்டியே திரும்பியதால், அந்த பணி துரிதப்படுத்தப்பட்டுள்ளது.பிப்ரவரி 11 — இந்த மாதத்தின் கடைசி ஏவுதல் தேதிக்குள் ஆர்ட்டெமிஸ் பயணம் தொடங்கினால், மூன்ஷாட் முன்னுரிமை பெறும் எனநாசா மிஷன் மேலாளர்கள் தெரிவித்தனர்.அப்படி நடந்தால், அடுத்த நிலையக் குழுவினர் ஆர்ட்டெமிஸ் விண்வெளி வீரர்கள் பூமிக்குத் திரும்பும் வரை காத்திருக்க வேண்டிய நிலை ஏற்படும். அதன் பிறகு அவர்கள் மாத இறுதியில் ஏவப்படுவார்கள்.“நாங்கள் அனைவரும் தனிமைப்படுத்தலில் இருக்கிறோம். ஒரே நேரத்தில் இரண்டு ராக்கெட்டுகளை ஏவ முயற்சிப்பது சாதாரண விஷயம் அல்ல. ஆனால் நாசாவின் ஒரு பகுதியாக இருப்பது மிகவும் உற்சாகமான காலம்,” என அடுத்த நிலையக் குழுவின் உறுப்பினரான நாசா விண்வெளி வீரர் ஜாக் ஹாத்வே தெரிவித்ததார்.