சவூதி தாக்குதல் குறித்து ஈராக்கின் அதிர்ச்சி தகவல் மத்திய கிழக்கில் பதற்றம் மீண்டும் தீவிரமடைந்துள்ளது. சவூதி அரேபியாவின் எண்ணெய் வசதிகள் மீது நடத்தப்பட்ட ட்ரோன் தாக்குதல்களில் தங்களுக்கு எந்தத் தொடர்பும் இல்லை என்று ஈராக்கின் இஸ்லாமிய எதிர்ப்பு இயக்கம் (Islamic Resistance in Iraq) மறுத்துள்ளது.சவூதி அரேபியா, திங்களன்று நடந்த தாக்குதல்களுக்கு "ஈரானின் ஆதரவு பெற்ற ஆயுதக் குழுக்களே காரணம்" என்று குற்றஞ்சாட்டியிருந்தது. இதற்கு பதிலளித்த அந்த அமைப்பு, குற்றச்சாட்டை முற்றிலும் நிராகரித்துள்ளது.அந்த அமைப்பு வெளியிட்ட அறிக்கையில், "ஈராக் மற்றும் அதன் மக்களுக்கு எதிரான விரோத மனப்பான்மையே இந்தக் குற்றச்சாட்டின் மூலம் மீண்டும் வெளிப்பட்டுள்ளது" என்று தெரிவித்துள்ளது.மேலும், "யேமனில் இருந்து நடைபெறும் தாக்குதல்களைத் தடுக்க முடியாத நிலையை மறைக்கவே இத்தகைய குற்றச்சாட்டுகள் முன்வைக்கப்படுகின்றன" என்றும் அந்த அறிக்கையில் கூறப்பட்டுள்ளது.அத்துடன், சவூதி அரேபியா எந்தவொரு தாக்குதல் நடவடிக்கையிலும் ஈடுபட்டால் அதற்கு கடுமையான பதிலடி வழங்கப்படும் என எச்சரித்த அந்த அமைப்பு, யேமன் மீது விதிக்கப்பட்டுள்ள முற்றுகையை உடனடியாக நீக்க வேண்டும் என்றும் வலியுறுத்தியுள்ளது.முன்னதாக, சவூதி அரேபியாவின் கிழக்கு மாகாணம் மற்றும் ரியாத் பகுதியில் உள்ள எண்ணெய் உள்கட்டமைப்பைக் குறிவைத்து ஈராக்கிலிருந்து ஏவப்பட்டதாகக் கூறப்படும் ட்ரோன்களை தங்களது வான் பாதுகாப்புப் படைகள் இடைமறித்து அழித்ததாக சவூதி அதிகாரிகள் தெரிவித்திருந்தனர்.