அதிகரிக்கும் கொலைகள், துப்பாக்கிச் சூடுகள்; தேசிய பாதுகாப்புக்கு அச்சுறுத்தல் – எதிர்க்கட்சி குற்றச்சாட்டு நாட்டில் நாளுக்கு நாள் அதிகரித்து வரும் கொலைகள் மற்றும் துப்பாக்கிச் சூட்டுச் சம்பவங்கள் தேசிய பாதுகாப்பிற்குப் பெரும் அச்சுறுத்தலாக மாறியுள்ளதாக ஐக்கிய மக்கள் சக்தியின் பாராளுமன்ற உறுப்பினர் ஹர்ஷண ராஜகருணா தெரிவித்தார்.இது தொடர்பில் அவர் மேலும் தெரிவிக்கையில்,அரசாங்கத்தைத் தவிர நாட்டின் ஏனைய அனைத்துத் தரப்பினரும் இந்த அபாயகரமான சூழ்நிலையை உணர்ந்துள்ளனர். நாட்டில் நிலவும் முறையான பாதுகாப்பின்மை காரணமாக, பாரம்பரிய கலாச்சார நிகழ்வுகளைக் கூட சுதந்திரமாக நடத்த முடியாத சூழல் உருவாகியுள்ளது.பாதுகாப்பை பலப்படுத்துவதற்குப் பதிலாக, ஊர்வலங்களுக்கு கட்டுப்பாடுகளை விதிப்பது அரசாங்கத்தின் நிர்வாகத் திறமையின்மையையே காட்டுகிறது. பாரம்பரிய ஊர்வலங்களில் என்னென்ன கலாச்சார அம்சங்கள் இடம்பெற வேண்டும் என்பதை பாதாள உலகக் குழுக்களா தீர்மானிக்கின்றனஉயர் நீதிமன்ற மற்றும் மேன்முறையீட்டு நீதிமன்ற நீதிபதிகளின் ஓய்வுபெறும் வயதை உயர்த்த அரசாங்கம் மேற்கொண்டு வரும் முயற்சி, நீதித்துறையை முழுமையாகத் தங்களது அரசியலமைப்பு மற்றும் கட்டுப்பாட்டுக்குள் கொண்டுவருவதற்கான திட்டமிட்ட செயலாகும்.நீதிபதிகளின் ஓய்வுபெறும் வயதை உயர்த்தும் முடிவுக்கு இலங்கை சட்டத்தரணிகள் சங்கம், சர்வதேச அமைப்புகள் மற்றும் நீதிபதிகள் சங்கங்கள் என அனைத்துத் தரப்பினரும் கடும் எதிர்ப்புத் தெரிவித்து வருகின்றனர். இருப்பினும், இந்த எதிர்ப்புகளைப் பொருட்படுத்தாமல் அரசாங்கம் தனது மூன்றில் இரண்டு பெரும்பான்மை பலத்தைப் பயன்படுத்தி இதனை நிறைவேற்ற முயல்கிறது.அரசாங்கத்தின் இந்த ஜனநாயக விரோதப் போக்கைக் கண்டித்து தைரியமாகச் செயல்படும் இலங்கை சட்டத்தரணிகள் சங்கத்தின் மீது ஆளும் தரப்பினர் பாராளுமன்ற சிறப்புரிமைகளைப் பயன்படுத்தி அவதூறுகளைப் பரப்பி வருகின்றனர். பாராளுமன்றத்தை ஒரு கூத்து மேடையாக மாற்றாமல், சீர்குலைந்து வரும் தேசிய பாதுகாப்பையும், நீதித்துறையின் சுயாதீனத்தையும் பாதுகாக்க அரசாங்கம் உடனடியாக முறையான நடவடிக்கைகளை எடுக்க வேண்டும் என்றார்.