நேபாளத்தை புரட்டிப் போட்ட திடீர் வெள்ளம்- உயிரிழப்பு 362 ஆக உயர்வு நேபாள–சீன எல்லைப் பகுதியில் ஏற்பட்ட பயங்கர திடீர் வெள்ளம் மற்றும் நிலச்சரிவில் உயிரிழந்தவர்களின் எண்ணிக்கை 362 ஆக உயர்ந்துள்ளது. மேலும் 1,300க்கும் மேற்பட்டோர் காணாமல் போயுள்ளதாக அதிகாரிகள் தெரிவித்துள்ளனர். மீட்புப் பணிகள் தொடர்ந்து நடைபெற்று வரும் நிலையில், பல்வேறு பகுதிகளில் தொலைத்தொடர்பு மற்றும் சாலை இணைப்புகள் துண்டிக்கப்பட்டுள்ளதால் மீட்புப் பணிகளில் கடும் சிரமம் ஏற்பட்டுள்ளது.இமயமலையின் உயரமான பகுதியில் ஏற்பட்ட பனிப்பாறை அல்லது பனிக்கட்டி–பாறை சரிவு காரணமாக மிகப்பெரிய அளவில் நீர், பாறைகள் மற்றும் சேறு ஆற்றுப்பகுதிகளுக்குள் பாய்ந்ததாக செயற்கைக்கோள் படங்கள் சுட்டிக்காட்டுகின்றன.இந்த திடீர் வெள்ளப்பெருக்கு நேபாளத்தின் ரசுவா உள்ளிட்ட பகுதிகளையும், சீனாவின் திபெத் பகுதியில் உள்ள க்யிரோங் மாவட்டத்தையும் கடுமையாக தாக்கியுள்ளது. வெள்ளத்துடன் ஏற்பட்ட சேறு மற்றும் பாறைச் சரிவுகள் வீடுகள், பாலங்கள் மற்றும் சாலைகளை அடித்துச் சென்றுள்ளன.நேபாளத்தில் மட்டும் 359 பேர் உயிரிழந்துள்ளதாக காவல்துறை தெரிவித்துள்ளது. சீனாவின் திபெத் பகுதியில் மேலும் 3 பேர் உயிரிழந்துள்ளதாக தகவல்கள் வெளியாகியுள்ளன.நேபாளத்தில் நூற்றுக்கணக்கானோர் காணாமல் போயுள்ள நிலையில், சீனாவின் திபெத் பகுதியில் மட்டும் 558 பேர் காணாமல் போயுள்ளதாக சீன அதிகாரிகள் தெரிவித்துள்ளனர். அவர்களில் 260 பேர் வெளிநாட்டவர்கள் என கூறப்பட்டுள்ளது.நேபாளப் பகுதியில் காணாமல் போனவர்களில் உள்ளூர் மக்கள் மட்டுமின்றி சுற்றுலாப் பயணிகள், மலையேற்ற வீரர்கள் மற்றும் புனித யாத்திரை சென்றவர்களும் உள்ளனர்.அமெரிக்கா, உக்ரைன், மலேசியா, ஆஸ்திரேலியா, பிரிட்டன் மற்றும் கனடா உள்ளிட்ட பல நாடுகளைச் சேர்ந்தவர்களும் காணாமல் போனவர்களின் பட்டியலில் உள்ளனர்.வெள்ளத்தால் பல சாலைகள் மற்றும் பாலங்கள் சேதமடைந்துள்ளதால், தரைவழியாக மீட்புப் பணிகளை மேற்கொள்வது கடினமாகியுள்ளது.இதையடுத்து நேபாள ராணுவம் ஹெலிகாப்டர்கள் மற்றும் ஆயிரக்கணக்கான பாதுகாப்புப் படையினரை மீட்புப் பணியில் ஈடுபடுத்தியுள்ளது. ஹெலிகாப்டர்கள் மூலம் சிக்கியுள்ள மக்கள் பாதுகாப்பான இடங்களுக்கு அழைத்துச் செல்லப்பட்டு வருகின்றனர்.இதற்கிடையே, வெள்ளத்தால் உருவான நீர்த்தேக்கங்கள் வேகமாக நிரம்பி வருவதால் மீண்டும் மிகப்பெரிய வெள்ளப்பெருக்கு ஏற்படும் அபாயம் இருப்பதாக நேபாளமும் சீனாவும் எச்சரித்துள்ளன.குறிப்பாக ஆற்றில் ஏற்பட்ட அடைப்பின் பின்னால் உருவான ஏரி உடைந்தால், கீழ்நோக்கி திடீரென மிகப்பெரிய அளவு தண்ணீர் பாயும் அபாயம் இருப்பதால், ஆற்றங்கரையோர மக்களும் மீட்புப் பணியாளர்களும் எச்சரிக்கையாக இருக்க அறிவுறுத்தப்பட்டுள்ளனர்.