இயற்கை அனர்த்தத்தில் அரசியல் இலாபம் தேட வேண்டாம் மக்கள் கிளர்ச்சி வெடிக்கும் எச்சரிக்கும் மொட்டு கட்சி வெள்ளம் மற்றும் சூறாவளியால் பாதிக்கப்பட்ட மக்களுக்கு ஜனாதிபதி அளித்த வாக்குறுதிகளை அரசாங்கம் நிறைவேற்றத் தவறினால், வெகு விரைவில் மக்கள் கிளர்ச்சி வெடிக்கும் என்று முன்னாள் இராஜாங்க அமைச்சர் இந்திக்க அநுருத்த எச்சரித்துள்ளார்.பத்தரமுல்லையில் உள்ள ஸ்ரீலங்கா பொதுஜன பெரமுனவின் தலைமையகத்தில் நேற்று நடந்த ஊடகச் சந்திப்பிலேயே அவர் இவ்வாறு எச்சரிக்கை விடுத்தார். நாட்டில் ஏற்பட்ட இயற்கை அனர்த்தத்தின் பொறுப்பை ஜனாதிபதி உள்ளிட்ட அரசாங்கக் குழுவினர் இன்னும் பகிரங்கமாக ஏற்கவில்லை. அனர்த்தத்தின் விளைவுகளைக் குறைப்பதற்கு அரசாங்கம் செய்ய வேண்டிய பெரிய வேலைகளைச் செய்யவில்லை. நீர்ப்பாசன அமைச்சர் இது குறித்து இதுவரை மௌனம் காக்கிறார்.பாதிக்கப்பட்டவர்களுக்கு 25,000 ரூபா போன்ற நிவாரண உதவிகள் கிடைப்பதில் தாமதம் ஏற்பட்டுள்ளது. இன்னும் சமைத்து உண்ண முடியாத குடும்பங்கள் இருக்கின்றன. அரசாங்கம் 24 மணி நேரமும் மக்களின் வாழ்க்கையை மீட்கவே பயன்படுத்த வேண்டும், கொண்டாட்டங்களுக்கு அல்ல.25,000 ரூபா வழங்கும் வரை அரசாங்கத் தரப்பினர் வெளியே வரத் தயங்கினர். ஆனால், ஸ்ரீலங்கா பொதுஜன பெரமுன உள்ளிட்ட எதிர்க்கட்சிகள் மக்களுடன் இருந்து உதவிகளைச் செய்தன.மேலும், குடிபோதையில் விபத்து ஏற்படுத்திய சபாநாயகர் விவகாரத்தில் சட்டம் சரியாகப் பயன்படுத்தப்படவில்லை.திருட்டு, உயிர்த்த ஞாயிறு குண்டுத் தாக்குதல் போன்றவற்றை விசாரிப்பதாக அளிக்கப்பட்ட வாக்குறுதிகள் நிறைவேற்றப்படவில்லை. இயற்கை அனர்த்தத்தைத் தடுக்க முடியாது. ஆனால், மக்கள் போராட்டம் வெடிப்பதற்கு அரசாங்கமே காரணமாகலாம்.அரசியல் அதிகாரத்தைப் பயன்படுத்தி அதிகாரிகளை அடக்கியோ, நிவாரணப் பட்டியலை மாற்றியோ உதவிகளைத் தாமதப்படுத்த வேண்டாம். திறைசேரி நிரம்பி வழிகிறது என்று கூறியது போல், உடனடியாக தேவையான நிதியை வழங்கி மக்களின் வாழ்க்கையை மீட்க நடவடிக்கை எடுக்கவும் என அவர் வலியுறுத்தினார்.