அமெரிக்காவுக்கு நேரடி மிரட்டல்-உள்கட்டமைப்புகள் அழியும் ஈரான் எச்சரிக்கை அமெரிக்கா நடத்திய சமீபத்திய தாக்குதல்களுக்கு பதிலடியாக, பிராந்தியத்தில் உள்ள அமெரிக்காவின் "தாக்குதல் உள்கட்டமைப்புகள்" மீது தனது நடவடிக்கைகள் தொடரும் என்று ஈரான் அறிவித்துள்ளது.ஈரான் தலைநகர் தெஹ்ரான் வான்பரப்பில் வான் பாதுகாப்பு அமைப்புகள் செயல்படுத்தப்பட்டதாகத் தெரிவிக்கப்பட்டுள்ளது. மேலும், பக்தாஷ்ட், பர்ச்சின், செம்னான், கோர்ரமாபாத் மற்றும் மார்கஸி மாகாணத்தின் கோண்டாப் உள்ளிட்ட பகுதிகளிலும் தாக்குதல்கள் மற்றும் வெடிப்பு சம்பவங்கள் பதிவாகியுள்ளதாக உள்ளூர் தகவல்கள் கூறுகின்றன.செம்னானில் நடைபெற்ற தாக்குதல்களில் விமான நிலையத்தின் சில பகுதிகள் சேதமடைந்ததாக உள்ளூர் அதிகாரிகள் தெரிவித்துள்ளனர். அதேவேளை, ஈரானின் முக்கிய கனநீர் சுத்திகரிப்பு நிலையம் அமைந்துள்ள கோண்டாப் பகுதியும் மீண்டும் குறிவைக்கப்பட்டதாக தகவல்கள் வெளியாகியுள்ளன.இதற்கிடையில், ஈரானின் தென்மேற்குப் பகுதியில் உள்ள குசெஸ்தான் மாகாணத்தின் அண்டிமேஷ்க் வான்பரப்பில், அமெரிக்காவின் MQ-9 Reaper ரக ஆளில்லா விமானம் ஒன்றை இடைமறித்து சுட்டு வீழ்த்தியதாக இஸ்லாமியப் புரட்சிகரப் பாதுகாப்புப் படை (IRGC) தெரிவித்துள்ளது.மேலும், ஈரானின் தெற்குக் கடற்கரைப் பகுதிகளான கெஷ்ம் தீவு, பந்தர் அப்பாஸ், சிரிக் மற்றும் கொனாரக் ஆகிய இடங்களிலும் அமெரிக்க தாக்குதல்கள் நடைபெற்றதாக ஈரான் குற்றஞ்சாட்டியுள்ளது.இந்தச் சூழலில், பிராந்தியம் முழுவதும் உள்ள அமெரிக்காவின் "தாக்குதல் உள்கட்டமைப்புகளை" இலக்காகக் கொண்டு பதிலடி நடவடிக்கைகள் தொடரும் என IRGC செய்தித் தொடர்பாளர் தெரிவித்துள்ளார். அடுத்த கட்ட இராணுவ நடவடிக்கைகளும் முன்னெடுக்கப்படலாம் என்றும் அவர் எச்சரித்துள்ளார்.இதனுடன், பிராந்தியத்தில் உள்ள பல அமெரிக்க இராணுவத் தளங்கள் மீது தாக்குதல் நடத்தியதாகவும் IRGC தனித்தனியான அறிக்கைகளில் தெரிவித்துள்ளது.