அமெரிக்கா–தென்கொரியா உறவில் புதிய திருப்பம் அமெரிக்க அதிபர் டொனால்ட் டிரம்ப், தென்கொரியாவுடனான வருடாந்திர கூட்டு ராணுவப் பயிற்சிகளை பெருமளவில் குறைக்குமாறு உத்தரவிட்டுள்ள நிலையில், அமெரிக்காவுடனான ராணுவ ஒத்துழைப்பு தொடர்பான பேச்சுவார்த்தைகளை தொடர்ந்து நடத்தப் போவதாக தென்கொரியா தெரிவித்துள்ளது.குறிப்பாக ஈரான் மற்றும் ஹோர்முஸ் நீரிணை தொடர்பான பாதுகாப்பு மற்றும் ராணுவ ஒத்துழைப்பு குறித்து வாஷிங்டனுடன் தொடர்ந்து பேச்சுவார்த்தை நடத்தப்படும் என தென்கொரிய அதிபர் அலுவலகம் தெரிவித்துள்ளது.அமெரிக்கா–தென்கொரியா இடையே ஆண்டுதோறும் நடைபெறும் உல்ச்சி ஃப்ரீடம் ஷீல்ட் கூட்டு ராணுவப் பயிற்சியை கணிசமாகக் குறைக்க டிரம்ப் உத்தரவிட்டிருந்தார்.இந்தப் பயிற்சிகள் அதிக செலவு கொண்டவை என்றும், வடகொரியாவுக்கு தேவையற்ற வகையில் விரோதமான சமிக்ஞையை அனுப்புவதாகவும் டிரம்ப் கூறியிருந்தார்.மேலும், ஈரானின் அணு ஆயுதத் திட்டத்திற்கு எதிரான அமெரிக்க நடவடிக்கைகளில் தென்கொரியா போதுமான அளவு ஒத்துழைக்கவில்லை என்ற அதிருப்தியும் டிரம்பின் கருத்துகளில் வெளிப்பட்டது.டிரம்பின் கருத்துகளை தாங்கள் மீளாய்வு செய்து வருவதாக தென்கொரிய அதிபர் மாளிகை தெரிவித்துள்ளது.அதே நேரத்தில், வாஷிங்டனுக்கும் பியாங்யாங்கிற்கும் இடையே உருவாகக்கூடிய சாதகமான உறவு, எதிர்காலத்தில் அர்த்தமுள்ள பேச்சுவார்த்தைகளுக்கு வழிவகுக்கும் என சியோல் நம்பிக்கை தெரிவித்துள்ளது.இதன் மூலம், அமெரிக்கா–வடகொரியா உறவில் பதற்றம் குறைந்தால், கொரிய தீபகற்பத்தில் பேச்சுவார்த்தைக்கான புதிய வாய்ப்பு உருவாகலாம் என்ற எதிர்பார்ப்பையும் தென்கொரியா வெளிப்படுத்தியுள்ளது.